[S:151] [C:1r]

APOLLONII PERGAEI CONICORUM ELEMENTORUM

LIBER QUINTUS

A FRANCISCO MAUROLICO COMPOSITUS

LECTORI.

Ex octo¹ Conicorum libellis, quos Apollonius ad Eudemum scribens pollicetur, quatuor hosce, qui ad nos pervenerunt², multo iam labore correctos, ac necessariis demonstrationibus adauctos hactenus edidimus. Horum autem primus doctrinam tradit formandi conicas sectiones, Parabolen, Hyperbolen, et Ellipsim, et contrapositas, ac diametros transversas, rectas, coniugatasque deducendi; aliasque, ex aliis generandi. Secundus autem explicat proprietates omnes³ Tangentium, Nontangentium, ac Secantium in Hyperbola, Contrapositisque, Sectionumque axium⁴. Tertius quaedam trigona, et quadrilatera in contrapositis praecipue inter se aequalia scrutatur; et quarumdam se vicissim⁵ secantium linearum proportiones⁶; praeterea quorumdam angulorum in Ellipsi, et Hyperbola factorum comparationem. Quartus denique quot in locis se invicem conicae sectiones aut tangere, aut secare possint perspicacissime disserit⁷. Superest nunc quatuor reliquos si quando nobis⁸ in manus venerint, emendare: quod tamen cuivis praecedentes bene intelligenti facillimum erit: est enim Quintus ut Apollonius innuit⁹, ut plurimum¹⁰ de maxims¹¹, et minimis. Sextus de similibus, et aequalibus sectionibus. Septimus divisarum propositionum¹². Octavus Conicorum problematum. Sed ex his quintus, et sextus¹³ magis quam reliqui¹⁴ nobis desiderabantur¹⁵: nam quamvis tota horum quatuor libellorum materia pendeat a¹⁶ doctrina priorum, tamen de maximis, et minimis, aut de similibus, et¹⁷ aequalibus sectionibus nulla sit in illis mentio. Septimo, autem et octavo vel sponte carerem existimo enim nihil fere in illis tractari, quod ex praecedentibus elici non posset. Interim nonnullis¹⁸ fragmentis speculationum ad quintum, ac sextum pertinentium me oblectabo. Tu autem quisquis es, ingeniose Lector, vive, vale. Si quid novisti rectius istis; candidus imperti: si non, his¹⁹ utere mecum.