[A:1r] [S:5]

APOLLONII PERGAEI CONICORUM ELEMENTORUM LIBER PRIMUS¹

APOLLONIUS EUDEMO SALUTEM²

SI CORPORE BENE VALES ET ALIA SECUNDUM MENTEM tibi sunt; bene habet³. Mediocriter valemus et nos. Tempore, quo eramus tecum Pergami, cognovi te cupientem participem fieri conicorum a nobis compositorum. Misi igitur ad te primum librum iamdudum satis correctum. Reliquos, postquam perfecerimus, mittemus. Non enim te oblitum puto eorum, quae a me audivisti: quo videlicet pacto ingressum quemdam ad haec fecimus rogati a Naucrate geometra ex illo iam tempore, quo nobis vacavit profectus Alexandriam. Quare componentes ea in octo libros partiti sumus, quamquam non statim ab initio satis accurate⁴, quo ad ordinis perfectionem, scilicet obvia quaeque ponentes tanquam ad ultimum festinantes. Nunc vero temporis oportunitatem⁵ nacti concessam nobis correctionem exhibemus. Itaque contingit pleraque a nobis antea dictorum mutare, et primum ac secundum librum corrigere; ne mireris si incidas fortasse in haec aliter se habentia. Porro ex octo libellis primi quatuor cesserunt in elementarem educationem⁶. Continet autem primus quidem generationes⁷ trium sectionum et oppositorum⁸: et in ipsis principalia accidentia ut plurimum generaliter descripta, et multa praeter ea, quae ab aliis edita sunt. Secundus accidentia circa diametros et axes sectionum et coincidentes, et alia generalem, et necessariam utilitatem praebentia ad divisiones (quasdam enim diametros, et quosdam axes voco, cuius rei peritia ex hoc est libro)⁹. Tertius multa et mirabilia theoremata utilia et ad compositiones solidorum locorum et ad divisiones: quorum plura et pulcherrima nova sunt. Quae consyderantes¹⁰ cognovimus non esse positum ab Euclide locum super tres aut quatuor lineas, sed tantum particulam ab eo tactam, et hanc non feliciter. Non enim erat possibile sine inventis a nobis perficere positionem. Quartus autem quotupliciter conorum sectiones invicem et circuli periferia confligant¹¹: et alia praeter haec a nemine antea scripta: coni sectio vel circuli circumferentia quot puncta suscipiant. Reliqua vero sunt de elementari substantia¹². Est enim unus¹³ quidem de minimis et maximis ut plurimum. Alius¹⁴ de aequalibus et similibus coni sectionibus. Alius¹⁵ de divisis propositionibus¹⁶. Alius¹⁷ de problematibus conicis. scilicet haec omnia manifestiora fient inquirere volentibus: quemadmodum singula unusquisque libellorum indicabit. VALE